26.03.2021, 14:51
Қараулар: 40
Вакцинация басталғанмен, ахуал тұрақты емес

Вакцинация басталғанмен, ахуал тұрақты емес

Біраз күн бұрын ауданда «Covid-19» инфекциясына қарсы егу жұмыстары басталды. Бүгінде екпе салу науқаны өз ретімен жүріп жатыр.

Вакцина алдымен денсаулық сақтау және білім беру саласының қызметкерлеріне салынды. Аудандық аурухана директоры Тимуржан Мусағалиев вакцина қабылдауға қарсы көрсетілімдер болмаған жандарға егілгенін айтады.

Бас дәрігердің сөзінше, күні бүгінге дейін екпе 470 адамға салыныпты. Оның 110-ны екпені екінші рет алғандар екен. Алдағы уақытта вакцинаның кезекті легі келмек.

Сонымен қатар індетке қарсы екпе Дариян ауылындағы ауруханада да жүріп жатыр. Ол жақта 160 адам егіліпті. Бұл ақпаратты бізге аудандық №2 аурухана директоры Ғабитжан Ислямов берді.

Десе де, эпидахуалды тұрақты дей алмаймыз. Аудандық санитарлық-эпидемиологиялық қадағалау басқармасының басшысы Аят Үмбеталиев қазіргі таңда 90 адам жаман індет жұқтырғанын айтты. Ауруға шалдыққандардың 52-сі симптомды болса, қалған 38 адам симптомсыз екен.

-Індетті жұқтырған азаматтардың 35-і ауруханаға жатқызылды. Олардың 10-ы аудандық аурухананың жұқпалы аурулар бөлімінде болса, 17 адам облыстық инфекциялық ауруханасында, 8 адам Оралдағы көпбейінді ауруханасында ем алуда,-деді Аят Үмбетәлиев.

Түгелбай БИСЕН,

Бәйтерек ауданы